有關我們的那個公園

重有啊，我想講，原來今朝有場大火，以前學校附近既屋苑裡面果隻大木船成隻燒晒。我地果個唔知係點既過去，原來都已經俾場無情既火燒毀左。我重記得我嚮果度影過相，跳過爬過，果陣重係長頭髮直頭髮，無而家咁肥，單單純純有少少 baby fat，件衫有頂毛毛帽，大家一齊玩滑梯。我好記得果日著住條 b+ab 既短牛仔褲，著住 x-girl 爛粉紅色既長袖衫，揹左個兩個扣既 gucci 書包。到左而家，個袋同條褲去左邊我都唔知喇。記得有一次你同我講起，呢一個靡爛既回憶。啊，係啊，果個我地唔知係點疑似記得又唔記得既過去真係過去喇。船都燒埋，我地大家只係剩番破碎到不堪既回憶咋。

呢一種，到底係唔係一種成長。我地發現無情既世界，一件無得控制同阻止既事發生左，突然間，有一個 moment 我地知道呢種矛盾同衝突係必然既事，無得避開無得唔要。忽然間明白個故事係點又同時知道遊戲規則，只係我地無得改變只有接受。呢一種，到底係唔係一種譚家明鏡頭下既成長。

其實果個並唔係一個我要生要死好懷念好鍾意好迷戀而且會久唔久返返去既地方，只不過，我覺得呢件事太突然，而且我竟然有種唔捨得。

我只係忽然之間，好唔捨得，果個我去過一次既公園。